إبراهيم طلحة
شوفوا يا جماعة، احنا في عدوان صح، لكن هذا ما يعني ان احنا ندعمم من الفاسدين لليوم.
حرام ان الفاسدين والعدوان اخوان، وكل فاسد هو شريك أساسي للعدوان، وقد السيد عبدالملك قال: أي فاسد اخلسوا جلده. محد مستعد يغطي على فاسد.
بالله عليكم مثلاً التجار اللي رفعوا الأسعار رغم نزول لجنة من وزارة الصناعة والتجارة لمراقبة الأسعار ومحاسبة المخالفين من التجار، ما قد فعلت؟!
حرام ان كل الأسعار زادت وكل التجار مدعممين ولا ضاريين للدولة ولا للوزارة ولا لأحد كرت.
وطبعًا الهوامير الكبار اللي بيعرطوا من مناصبهم هولاء قصتهم قصة ثانية.
يعني ما بش في اليمن رجال مخلصين ومواطنين صالحين وإلا كيف؟!
والله ان به بس في كل الأحوال حقنا السرق بيوصلوا لحول دائرة القرار وما عاد يخلوا منفذ لأي إنسان مخلص لوطنه، لأنهم يخافوا يجي يفضح ممارساتهم.
تعرفوا ليش الناس كلهم يترحموا على الصماد سلام الله عليه؟! لأنه مات فقير مثل الناس مع انه من أسرة غنية وبإمكانه كان يستغل منصبه ويكون أثرى لكنه فضّل انه يعيش مثل بسطاء شعبه فمات عظيم رغم بساطته، ويقول لي أبي: والله ان الصماد كان مشروع حمدي جديد، وانه أشبه واحد سلوك بالحمدي، وما في شك ان العدوان ما يشتوش لليمن واحد صالح وناجح ومخلص وصادق، هم يشتوا عينات الفساد اللي تجلس ترتعي من السعودية والا تخلس شعبها.
المهم شكلوا لجنة لمحاسبة الفاسدين، ولا تقولوا للمواطنين اتصلوا على الرقم هذا والا ذاك، لأن المواطن ما عايباسلش ويغامر بنفسه ويتصل وبعدين يتحاسب هو والمسؤول ينجو، لا تفعلوا أرقام ولا شي. اسمعوا شكاوى المواطنين وبعدين نزلوا لجان مفاجئة وصوروا عمل اللجان بالصوت والصورة من لجان فوقها، وكل لجنة فوقها لجنة أعلى واللجان الأعلى يعينها السيد. على شان لا حد من اللجان يستغل منصبه وعمله في ابتزاز الناس برشاوى وبرشتة.
أنا أؤكد لكم انه قده وقت محاسبة الفاسدين، كما ما عاتقدروا لهمش بعدا. عيكونوا بعدا هم الدولة العميقة!!
(63)
